ອົດສະຕຣາລີ ເພີ່ມງົບປະມານປັບປຸງກອງທັບເຮືອໃຫ້ທັນສະໄໝ
ໜັງສືພິມກອງທັບປະຊາຊົນ ຫວຽດນາມ ລາຍງານໃນວັນທີ 20 ກຸມພາ ຜ່ານມານີ້ວ່າ: ອົດສະຕຣາລີ ໄດ້ປະກາດແຜນການເພີ່ມ
ລາຍຈ່າຍດ້ານວຽກງານ ປ້ອງກັນປະເທດ 7,25 ຕື້ໂດລາ ເພື່ອປັບປຸງກອງທັບຫັນໄປສູ່ທັນສະໄໝ ໃນປີຕໍ່ໜ້າ, ທັງເລັ່ງໃສ່ການສະໜອງ
ກຳປັ່ນຮົບໃຫ້ກອງທັບເຮືອ ແລະ ຂະຫຍາຍອຸດສາຫະກຳການຜະລິດກຳປັ່ນ ພາຍໃນປະເທດ.
ທ່ານ ຣີຊາດ ມາເລສ ລັດຖະມົນຕີ ກະຊວງປ້ອງກັນປະເທດ ອົດສະຕຣາລີ ໃຫ້ຮູ້ວ່າ: ງົບປະມານເພີ່ມເຕີມຂອງກອງທັບເຮືອ, ທາງ
ລັດຖະບານ ກໍຄືກອງທັບຈະລົງທຶນໃນການຈັດຊື້ ແລະ ບຳລຸງຮັກສາເຮືອປະມານ 54,2 ຕື້ໂດລາອົດສະຕຣາລີ ໃນ 10 ປີຕໍ່ໜ້າ. ດັ່ງນັ້ນ,
ຈະເພີ່ມລາຍຈ່າຍດ້ານການປ້ອງກັນປະເທດໃຫ້ເຖິງລະດັບ 2,4% ຂອງຈີດີພີ (GDP), ສູງກວ່າເປົ້າໝາຍ 2%, ທີ່ອົງການສົນທິສັນຍາ
ປ້ອງກັນອັດລັງຕິກເໜືອ (NATO) ວາງອອກ. ໃນຂະນະດຽວກັນ, ກອງທັບເຮືອອົດສະຕຣາລີ ຕ້ອງເພີ່ມທະວີຄວາມສາມາດຮັບປະກັນ
ຄວາມປອດໄພໃຫ້ແກ່ເສັ້ນທາງການຄ້າທາງທະເລ, ເພາະວ່າເສັ້ນທາງດັ່ງກ່າວເປັນພື້ນຖານໃຫ້ແກ່ຊີວິດການເປັນຢູ່ຂອງປະຊາຊົນ ແລະ
ຄວາມຈະເລີນຮຸ່ງເຮືອງຂອງປະເທດ; ເມື່ອກອງກຳປັ່ນຮົບທັນສະໄໝຈະເຮັດໃຫ້ກອງທັບເຮືອໄດ້ຮັບການປັບປຸງໃຫ້ດີໃນການປະຕິບັດ
ງານໃນສະພາບແວດລ້ອມປັດຈຸບັນ ແລະ ອະນາຄົດ. ຕາມແຜນການ, ອົດສະຕຣາລີຈະເພີ່ມກຳປັ່ນຮົບຂະໜາດໃຫຍ່ 26 ລຳ, ເພີ່ມຂຶ້ນ
ຈາກ 11 ລຳໃນປັດຈຸບັນ ແລະ ຕ້ອງເປັນກຳປັ່ນໃຫຍ່ທີ່ສຸດຂອງປະເທດນັບແຕ່ສົງຄາມໂລກຄັ້ງທີ 2 ສິ້ນສຸດລົງ.
ນອກນັ້ນ, ໃນບັນດາກຳປັ່ນທີ່ສ້າງໃໝ່ຈະມີກຳປັ່ນອະເນກປະສົງ ແລະ ກຳປັ່ນຮົບ ບາງລຳຈະຕິດຕັ້ງລູກສອນໄຟໂທມາຮັອກ ໄລຍະໄກ.
ຄາດວ່າ, ກຳປັ່ນລຳໜຶ່ງຈະສ້າງຢູ່ນະຄອນ Port Adelaide ທາງພາກໃຕ້ອົດສະຕຣາລີ, ຂະນະທີ່ກຳປັ່ນອີກຈຳນວນໜຶ່ງຈະອອກແບບຢູ່ອາ
ເມຣິກາ ແລະ ອາດຈະສ້າງຢູ່ປະເທດແອັດສະປາຍ, ເຢຍລະມັນ, ສ ເກົາຫຼີ ແລະ ຍີ່ປຸ່ນ.
ແຫຼ່ງທີ່ມາ: ໜັງສືພິມກອງທັບ
ວັນທີ 05/03/2024